Phili 2 | BEF | STEP | Lenali Kilisitotoga lenemehi emi'ohuta'mu yabe lite amuya nehafiye? To ai ginaga fi lepolo'ehinamu'i komopatini fulu higo neminafiye? To Hu'mamofihi Sikalafu'i hiti i hepite minelata nehafiye? To ai keke'i lu etago ai keke'i lu etago hite minelata nehafiye? Yamofihi asaga'i lenalitoga ni'ifiye?

Philippians 2

Kilisito ai'a komopa'a limilata hu'ehina ya'mu luto Hu'mau le'mo ho ti'ehina ka'a

1 Lenali Kilisitotoga lenemehi emi'ohuta'mu yabe lite amuya nehafiye? To ai ginaga fi lepolo'ehinamu'i komopatini fulu higo neminafiye? To Hu'mamofihi Sikalafu'i hiti i hepite minelata nehafiye? To ai keke'i lu etago ai keke'i lu etago hite minelata nehafiye? Yamofihi asaga'i lenalitoga ni'ifiye? 2 Ni'inogomo komopatinigu bati'na netinogo kehelito minalane lite keheli'ahana li nupa hino. Ya nehite komopatini emilatana to komopatini lenegekesa li mu tifilatana yamofihi moneko legege huto tito minalibe. Ya nehinogo nani negelo sipi'a bilube. 3 Lenalitinimu kehelite lenugufa lelitetiti nehanamofihi melilo. To lenigi le'mo saga mehilo. To lenegekesa yigite ligiti enebe ligilune lite ya melilo. Lenali komopatini lelite limite melelete lenigibo lenagabo enali kumu kehelinogo tilibe. 4 To moneubafi moneuba ai'a ya'ma lamana hilube luto foya'a melise lalu'agihi luga'a hiti lamana hilabe luto foya lite enehe'mite kehelilibe. 5 Yesu Kilisito ai'a kehelilata hu'ehinamofihi nasana ana suhi huto lenalitoga mineno.

6 Ai Hu'mamofihi mehi huto mino'ehinaya Hu'ma hiti legege huto sipi bo minalube luto ya meluse to yana'mu amuya memolose huto ai'a sekele mamu'a fa'mene he'miloto agoya bameta mehi li mololoto bona'magita bameta mehi lolo huto huto hu'ehinamo ni'ibe. Minoto lito hu'ehinamofihi bona'magita lali bamehi huto mino'ehina. Yalo kele kele bo ana suhi mino'ehina. 8 Ai'a komopa'a lelito limito mololoto Hu'mau lu'ehina kagalo mege mege huto fililatanamofihi lito li tupa huloto malipu yafalo fili'ehinamo ni'ibe. 9 Ya higo ya hina'mu yabe luto afo'afu Hu'mau le'mo saga higo ifoga kibina boti sipi'a le'mo lolo higo ai gi'a yauba tito minenogo bona'magita ligi'a limito minalibe luto lu eto'ehinamo ni'ibe. 10 Ya hulenogo kokulumagu to melugu to me'i komopa'agu ema neminana'a hiti enali moneko kumu Yesuhi gi'a hete enalapusa fite fokehi lilabe. 11 To enabagaguti enabagaguti ya'ma Yesu Kilisitohi ai Sipi Boti nohibe lite nelite kululu kululu tite halana yanauba tito minoto afo'afu Hu'mamofihi gelo bise'na lolo huto minalibe.

Bona'i luga'a metepugu nehana lenali sonofi'i lolo hite fi fana te epalalo

12 Ya'mu komopa'ni lepi'ohuna yagapana'ni lenali kumu kana'amu kana'amu ka'ni kehelite lite mine'ahana ya suhi hite molo emite minalabe. Lenali hiti mino hepito nohuna ni'igopa foto'i nohuto lenubuto nobunamofihi lamana'a li huto nehinogo haya kolo lalune lite topa topa hite amuya malalo. 13 Hu'mau komopatini le'mo bati nohigo ai lili'na'a amuya melete ai amuya'alo neligo to legeya'a li huto hilata lenele'mo hetofa hulata nohibe.

14 Lenali ana'ina silaga'i nelite kenasabo bise'na nebite ai bugu finogo ai bugu finogo mehilo. 15 Ya nehite foipanatini meminose komopatini gulu gulu linogo minalabe. Ya nehite bona'i li nupa hilata lisipa bise bo to li sibina sabana hilata nehana bona'i enali metepu komopa'agu ya'ma lenali Hu'mamofihi panala'a pana'a komopatini bati hulenogo lolo hite minete sonofi'i lolo hite fi fana talabe. 16 Fi fana telenogo amuya lenemehi hite minolatanamofihi ka'a li huto hite molo epelete minalabe. Ya nehinogo Kilisitou henetilenogo ya'ma lenali kumu yabe luto bula ola hu'ohuna to foya'alo keta'a hite li'ohuna yamofihi fa'mene'mu meni'ibe. Yamofihi hapa'a huto hilenogo negelo bito komopa'nigu bati nohinogo kehelilube.

17 Lenali Hu'mamofitoga keheli ule'ale hite agoya hu emilatana ya'ma yaga hoto efaha hitalo go emilatana suhi luto ni'ibe. Ya huto ni'igo fatehe bona'magi nehe fililenogo golaha'ni yamofihi gupisalo hekiluna suhi luto ni'ilibe. To ya hi netelenogo nani lenali kumu yabe luto negelo bilube. 18 To lenali ana hite lenegelo nebite nani kumu komopatinigu kehelilo.

Timoti yagi Epapolotiko yagi

19 Sipi Bo Yesu bati huto yabe linogo Timotihi mele'isi lenalitoga ho lifinogo'ni bilibe luto nolube. Ya hulenogo lenalitogati kaga mone i gelehe huto enogo keheliloto komopa'nigu bati hinogo kehelilube. 20 Bona'i ai tegi'a mone maga menehabe. Ai'a lamanana'atu lenali kumu kehelito komopa'atu lenele'mo hetofa hulata nohibe. 21 Bona'i luga'a enali'anigo kehelite Yesu Kilisitohi lili'na'amu mone kehelilana'a mehabe. 22 Timotiu ai minoto lito nohinamofihi hapa'a bati hu'ehigo akeheli'ahanamo ni'ibe. Ai pana'i moneuba afo'afi he'malata suhi luto ka lamana'amofihi foya'a nehe'moto li'ehina yabe. 23 To nanitoga ana'ina ya suhi huto ma suhi huto hilina'mu ya'ma keheli bati huloto ai ya'ma mele'isi ho lifinogo bilibe luto keheli'ohube. 24 Ya hinogo Sipi Bouba keheli niminogo nani'ni hiti ya'ma fana hoto minoto'ni lenalitoga lilube'mu ya suhi huto ya'ma keheli'ohube.

25 Nani bo mone lesa meligo minoto ka lamana'amofihi foya'a amuya moloto nehe'mo'ehina bomo, gi'a Epapolotikohi lenali nanitoga yata'a ho lifi'ahana bomo, aku'i lenalitoga ho lifilube luto komopa'nigu amuya nomolobe. 26 Ai besi'ehina yamofihi kaga'a akeheli'ahanamo ni'ibe. Ai lenali kumu keke'i lu lepoloto ai kumu kehelinogo lenuluhaya ti laligihe luto lenali kumu keheligo keta nohigo nolube. 27 To besigo filise'na hu'ehina'mu Hu'mau ai'a komopa'atu le'mo bati higo ye koto nohibe. Hu'mau ya huto le'mo ye ko nohuto'a nanitoga ana huto keke'i lu'ehina yabe. Hena'mube? Ai filitita nanitoga keta huse'na sipi minatita'mu yabe. 28 Ya suhi higo lenali Epapolotikohi bu gelete komopatini lamana'a kehelite aku lenegelo bilabe luto to nani ana huto kehelugo keta mehinogo minalube luto yatai ya'ma babahi huto ho lufugo foiya nobibe. 29 Yamofi kumu ya'ma komopatini bati hinogo keheli emite Sipi Bomofitoga hepi'ehina bo nohibe lite le'mo lamana hilo. Lenali bona'i ya'a enele'mo hofa tete lenemehi epilo. 30 Ai Kilisitohi foya'amu yabe luto filise'namu koli mehuse li'ehina yabe. Ya huto lenali foto minete nele'mo bati mehago ai kele kele'i hu netalibe luto gufa'a katiya'i hilube'mu keheligo keta mehu'ehibe.